2005帛琉之旅 之 十四

岩岩睇完報告~~~
好在無事，虛驚一場！

話說我去完帛琉返黎之後，又去左龜島heahea沉沉，點知返黎之後有小小不適，我以為是轉天氣著涼，點知．．．．． 幾日後，去完街的一個晚上，沖完涼．．．．忽然身體有異樣，所以即刻出門睇私家醫生，點知佢都十五十六，即時提議我去醫院！於是我即刻趕去醫院急証室，當值醫生問診後都唔確實我係唔係中左．．．．． 比你地估下先　（賣個關子）

嗱．．．．估左先好睇落去呀！！！！！

嗱．．．．真係估左

唔．．．．估多次先啦～～～～～








話說我回港後個幾日已經好疲累，肌肉又酸痛，成日有類似輕微感冒者的症狀（頭慶慶，不過無發高N），又流鼻水，又有幾聲‘吉’，所以最初我以為回港後天氣變，我著涼。點知．．．最慘有一晚係我無啦啦勁出疹！

基於我曾經出遊，某一天晚上睡覺又比蚊針左兩口，而且潛伏期又相似．．．．．加埋加埋，症狀有七八成似登革熱；最叫人擔心的，是這個無藥可治、無疫苗可防、死亡率高達三成的疫症。

所以當時嚇得我屎下屎下～～～～～

不過好在醫院報告最後指出，我只是受過濾性病毒感染病情，而非登革熱，因此才放下心頭大石。

所以叮囑大家一句，出郊外或出遊，最好做好防蚊措施！

附加資料

登革熱是一種由過濾性病毒引起的急性傳染病，病徵包括三至五日的高燒、嚴重頭痛、肌肉及關節痛、眼窩後疼痛、噁心、嘔吐及出疹，發燒期間隨時可能出現牙肉和鼻孔出血。登革熱潛伏期為三至十四天，病後有可能出現極度疲倦及抑鬱症狀，偶然病者會惡化至登革出血熱，並進一步出血、休克，及引至死亡。但也有症狀輕微的不顯性感染，症狀類似輕微感冒者等。

2005帛琉之旅 之 十三

第五日

由於今早沒有活動，只係等中午食完午餐就去機場搭機回港，所以我今朝一早起身，落樓下吃完早餐，就用11號巴士作環島行。

首先去郵局辦事，跟著去左幾間以為比較平價的住宿地點睇環境及取資料（以備下次出遊之用），不過好可惜，d價錢比我想像中貴，而且條件有d唔太理想；之後曾經搵過住宿型民宿，但一問之下，原來佢地唔租短期，要長約．．．即係又無行，所以我繼續邊走邊睇，邊問邊拍照。

由島頭行到島尾，再加上八黎八去，周圍影相，又參觀其他店舖和沉水店，真係用左唔小時間；由於要趕返酒店退房和吃中午飯，所以我以快速徒步回程。終於係退房半個鐘頭前返到酒店沖返個靚涼，抖一抖。

正當我沖完涼執拾之際，房門外就有人拍門，我濕漉漉的去應門，只見G1在門外，G1想問我攞先前打泥漿戰既照片比B1睇，但由於我昨晚已經將所有相片抄落電子相簿處，因此不可以傳閱；我講左比G1聽，但佢又好似唔太明白加唔想走，不過我當時真係無相比佢睇，G1就垂頭喪氣撤退；但不出數十秒，又黎拍門死nur；佢話B1有帶手提電腦，應該有辦法抄Ｄ相出黎，叫我交出電子相簿，但係我跟本無帶條cable黎，比左你都無用；解釋比G1聽，佢似明又唔明，死口話交電子相簿比佢，B1就有辦法把相片抄出；我好無奈入房取部電子相簿交比佢，不過順帶一提，叫佢地唔好亂黎，有乜意外整壞左個電子相簿就全軍覆沒，並千叮萬嚀叫B1小心處理電子相簿。交出電子相簿後，G1才滿意地離開，之後我繼續執包袱及整理行李。

過左幾分鐘，又有人拍門；一開門又見G1，佢話B1連繫不上電子相簿，所以退還給我（我一早同你講左，係你死硬派話有辦法要取去攪一攪）；我收回電子相簿後就執好包袱退埋房，跟著去餐廳入坐等食自助午餐。之後各人碌碌續續入坐，F1和F2同我坐埋枱，G1黎到又話要坐埋一齊，不過張四人枱比佢坐埋落黎，B1就會無位坐，因此G1只好坐在我地後面。

由於先前吃左個豐富早餐，而我外出了約三個小時，體力消耗不多，所以無乜食慾，最後食左ｄ美味咖哩加印度薄餅就足夠了。食到差不多尾聲，住係第二間酒店既A團來到加入食力戰，之後我地全團出發，去埋最後一個景點　－　男人會館。

在大堂內，當地導遊叫我地先行上車，行李會有其他車輛接載到機場，於是一行人上左架旅遊車出發。架旅遊車出左大街行左無耐再轉入一巷內就話到了；呢處本來我都有黎過，不過轉左上黎，所以我先前從來都無走到條巷的內彎。在途中，C1神色凝重行來車頭同當地導遊導遊私私細語，講完之後地導遊導面有難色，之後急忙打電話，原來C1佢地漏左個手提袋係餐廳，真係唔知搵唔搵得返。不過C1話好彩無貴重物件再內，搵唔搵得返都無問題，不過搵到就最好啦。

唔洗五分鐘車程就到站，我坐在前排，所以可以一支箭衝左落車去影相；不過行到埋去，呢間男人會館只係得個殼，內裡燈都無一盞，黑嘛嘛，無乜好睇。影左幾張相ｄ人潮就黎到，我唯有等一等，點知呢個拍完到此一遊，０個個又拍，等到我頸都長埋都未再有機會拍風景照。就係呢個時候，前後不到十分鐘，當地導遊就催人上車，出發去機場了。

我好無奈返回車上，旅遊車就向機場進發，車程約二十分鐘左右就到；到達機場，我地ｄ行李仍然未到，於是我就係機場四周繼續影相，影影下又分派機票，機票到手後，載行李架車先慢慢駛到，人群一窩蜂去取行李，跟著就去櫃台辦登機手續。而我就繼續拍照，後來人群散去，剩下F1和F2在外等我，我見團友全部不知所蹤，就趕回來同F1和F2辦理登機手續，辦完之後我又周圍行繼續影相，可惜帛琉個機場好鬼細，行幾步，走兩走就行完。於是我上左去二樓，在一小型快餐店內，我發現G1，B1，G2，KS1，KS2等人，於是我坐埋去殺時間等上機，間中又偷影佢地既趣怪表情。坐左成半個鍾，就到入閘時間；我提議去攪出境手續，一行人就動身前往，櫃台前得我地幾丁友，過完出境處入到大廳，原來所有人都已經在內等候。幸好呢個大廳有一兩間免稅品店，我就走左去八一八，八到夠鐘開閘就排隊上機回香港了。

一個超級超值又難忘的旅程，就此劃上句號。

全文完。

2005帛琉之旅 之 十二

第四日 (下半)

第三沉

由於今次既沉點由DM1臨時決定，所以去邊處，真係無人知！我地坐左響隻快艇上，漫無目的加上前路茫茫，只見四周海水處處，一個小島都無，但天色開始時暗時晴。快艇開行左幾二十分鐘，遠處就望見一個大島，但島既另外一邊（外圍，可能是轉流處），就見巨浪鵬鵬聲湧來，但島的前方，就水平如境，睇落真係完全兩個世界。隻快艇係個島前方停左落黎，跟著DM1就叫人落水，正當我地想著上沉水儀器時，DM1話我地唔洗急，呢處唔係我地既沉點，出面風大浪大既地方先係．．．唔係化！ｘ

原來DM1叫浮沉既人士落水，然後游向岸邊慢慢玩。C1和C2好快跳左落水，而C3和C4準備帶面罩和蛙鞋未落水之際，只見C1和C2踏行晒turbo不斷向前游，好奇怪啊！佢地未等齊自已友就游左去，於是我問：『游禁快做乜呀？』C1和C2異口同聲話：『我地一跳左落水就發現一隻海龜，宜家追緊佢！』

又係海龜！！！Ｘ

當全部浮沉人士落晒水，隻快艇又開動，今次真係朝著大浪方向前進；我問DM1真係去出面沉呀？佢話係！隻快艇繞左個彎繫好船纜，就到左今日個沉點　－　Ngedebus Coral Garden & Wall

水面真係風大浪大，企係船上面都覺拋下拋下，何況落水？！各人戰戰兢兢著好儀器等出發，沙一聲，就嘩啦嘩啦落起雨黎，而溫度又下降了少許。又凍又落緊雨，當然無人想落水，好在此為過雲雨，沙啦左一陣就停左，而且又再出陽光。

機不可失，DM1又催眾人下水；但由於大浪，而之前幾條友仔又唔肯先落水，我望一望，就董一聲，第一個帶頭跳落水；不過一落水就大獲，被強流沖去反方向，但因為要由船中游向船頭落纜之處既下沉位，因此就算超級大浪，又要頂流，都要拼老命游過去，真係有幾野被ｄ浪拍到撞埋隻船邊；而且水流亦大，游黎游去都游唔旭，好費力勁，我死都咬住個reg唔放，如果唔係真係飲成缸海水。幾條友仔係船上望著我拼死的頂流，都未肯快快落水匯合。

我係水中掙扎游向船頭之時，DM1再繼續催其他人落水，之後F1，B1，G1都相繼落水，我頂流游左好耐先去到船頭，當時F2仲坐係船邊處望住個海，見到大浪就心悸，想落又唔落；我同F1大叫F2快D落埋黎，唔好成村人食晒大浪而等佢，最後．．．．F2臨陣縮沙，唔落水！

DM1知道後，就聯同其餘四人頂流去船纜個邊下沉；嘩～～一落水下沉，又係另外一個世界，水底下無湧無流，視野又清楚，可望到約二十米既視線，而且海水呈現碧藍，好靚好靚。

我地沿著一塊大形礁石前進，礁石上長滿珊瑚，有硬又有軟，形態跟以前過往所見既有不同，真係大開眼界！水中生物多不勝數，有大有小，蘇眉成日在你身邊游過，神仙魚又成群成群出現，再加上其他深海魚群和八爪魚，呢個位見既野真係好到無得彈。

玩左唔夠半程，B1就無氣，又要同DM1分享；我見到呢個情景心都涼埋，因為B1從此就受限制於DM1之下，唔可以亂黎，又唔可以周圍走，真係大快人心！

由於今次人小，而且最唔聽話０個個又比人捉住，所以DM2帶頭帶左我去好多地方，拍左好多珍貴片段；由於我地兩個游得快，好多時都係前面睇完野之後，就要等埋後面又影相又游得慢個三個；正當我地呆等之際（呢個時候DM2面向我，背著後方），嘩～～～我發現有好野呀，我眼仔碌碌望到遠處外有一塊陰影．．．然之後舉手指一指．．．DM2知道我有野想講，就即刻轉身．．．之後定左一定，再即刻舉起部攝影機．．．拍呀！

原來有一大大條manta，用好優美的姿態，一路拍鰭，一路游向我方；manta優閒地在水中飛翔，伸展雙鰭如拍翼般；一來一回就游到我身前約四五米之處，條manta真係好大條；深藍的海水襯著白色的身驅，好比油畫一般鮮艷奪目，我望住條manta發呆了。

本能上我想游上前同佢一齊暢泳，但自問泳術不佳，反應又遲鈍；不需數秒，牠已經在我眼前游走了，我向著牠跟牠揮手，無聲無色的說再見。此時，其餘四個沉人剛趕到，用了兩秒看manta一眼，manta很快就消失於碧藍中；之後我地繼續前行看其他海底風光，不多久，又是時候升水了。

升水上到水面時，水面情況比下沉時平靜得多，但上船仍有小小困難；眾人快手快腳爬上船，就嘻嘻哈哈開心地說：『今天運氣真不錯，見到難得一見既manta ray。』而我都很開心，起碼完成了今次行程既其中一個目標。

在船上，其他浮沉人士聽到我們的經歷也羡慕不而，而且佢地提及到今次最後沉點也很有收獲，雖然是浮沉，但所見既珊瑚礁及魚類，也比見前幾日所見的種類繁多，五花八門，多采多姿，絕對不枉此行。佢地又多謝我地帶憩佢地有多一個浮點下沉，不然參加其他活動，必定只得兩浮點，而沒有最精彩的附加禮物。

之後隻快艇就駕駛回沉水店，一路上個個都累得無聲出，坐在船上打瞌睡；約四十五分鐘，就回到沉水店的碼頭，各人各自取物品上船，把有關儀器放入清水清洗，就自行交還。由於我要換衫，就走左去更衣室排隊；出黎之後，自己人唔見晒，得返ｄ三唔識七既其他沉水人。但我發覺我之前拿去浸清水既儀器唔見左，細問之下，又無人答我話幫我攞左去歸還，真係有小小驚被人罰款；後來F2同我講話回收處唔會一五一十核對所有借出物品，叫我有幾多攞幾多去還就得，於是我除左唔知條鉛帶比邊個攞走左外，就全部儀器歸還。

跟著就去總台交費，但係總台服務員真係任你講玩過d乜，就收你費用，原全唔洗左查右查；但我地都好誠實既，玩左幾多支氣都會如實報上；個個差不多比完錢之後就等車來接我地回酒店，點知B1和G1又唔知做乜，個個攪掂晒等走人，佢地兩個衫又未換，儀器又未收拾好；我叫G1趕緊時間快D付款及收拾行李，因為個個企晒係門口等你地，點知我比人寸話催生晒，重叫我話唔好催佢喎，
真係十幾個人，等你兩件咪咪麼麼！

啍～～於是我出大門口同大家影大合照，又叫埋DM1一齊黎影，再加上P1和P2（佢兩個今日跟第二艘快艇出發，比我地遲小小返到，不過都攪掂晒所有野，等車一齊返酒店）。大家興高采烈影左一輪相，幾架VAN仔就來到接大家歸航，三架車都上滿人開走左，而B1和G1重未出黎，攪乜鬼，唔捨得走呀？！最後攪到我，F1，B1和G1無車回程，幸好有個沉水會既義務人士，私人出車車我地返酒店而不致於呆立街頭。

在車上G1又同義務人士搭訕，而我同F1，B1好開心禁玩自拍及偷拍，攪鬼氣氛加笑聲充滿車廂內；約十分鐘的車程，就回到酒店沖涼清洗，之後夠鐘就出門吃自助晚餐。

今日自助晚餐很豐富，雖然菜式不算很多，但唔洗自己再比錢，而味道又好好味既就已經十分不錯了，吃得我滿肚子漲一漲。但係呢頭個個放低隻叉，個頭就有人招集去食日本菜，唔係化～～～個肚真係無空位再放下任何食物喎，除非夜D先出發啦；點知真係呢頭講，個頭去，我呢餐都未落隔，重點會跟佢地去吃多餐丫，於是分道揚標，一批人去食多餐，一批人去行街街。

我行完街街就同G1返酒店，之後睇左陣書，吃左一大堆零食，就同G1分別回房訓覺覺。

就係禁，十分充實的一天就完成了，明日要回港，真係好唔捨得呀！！！

2005帛琉之旅 之 十一

第四日 (中場)

第二沉

快艇好快又駛到大斷層，而今日所停留之處，與昨日潛沉的位置有所不同；由於昨日浮沉也見了不小好東西，所以我也滿懷信心今次下沉應該有好收獲

快艇首先在一邊先放下浮沉的團友，之後向另一方面行駛，在一個適當的地方拋錨；之後各人穿上儀器，又準備下水。今次各人動作比較第一次快手，可能開始掌握了秘訣，因此反應敏捷了。當各人攪掂晒，正想落水之際，我就發覺G2坐左响處，問G2做乜唔著上Gear，佢話想去浮沉，所以唔跟我地落水，唔～～都好，起碼唔洗DM1分心，要全程磅實佢。（我後來從G1口中得悉，原來係第一沉時，DM1為左追B1，把G1留低，當時佢怕的要死，所以唔敢再落水．．．．係咪呢，G1明知佢唔夠班都拉埋G2去，而佢之前又無學滿師就攞左個牌，之後又唔補課又無練習，你話係咪攞黎煩丫）

當我想落水之實，只見海面上有浪花，雖然情況不太嚴重，但已經令其餘四人遲遲都唔肯跳落水．．．我真係唔想在浪中等候，於是我望住佢地，催佢地快ｄ落水；又催左一陣，真係個個都敵不動，我不動既款，浪費晒ｄ時間！最後F1自告自奮勇跳左落水，在水裡大叫，唔好等啦，快ｄ落水．．．．跟著G1落水，F2又落水，我又落水。我落左水之後，應該到B1，點知當佢坐係船邊預備翻筋斗落水之實，個船夫按著B1唔比佢落水，重用手勢話佢唔落得水．．．B1當時傻岳岳望住個船夫，我就係個海處望住佢地既情形；後來船夫指手劃腳，一手伸向B1個氣瓶，然後轉轉轉．．．跟著指著B1話無開氣喉就落水，唉～～真係怪事無奇不有．．．我又開始擔心！

後來我和B1游向其餘眾人之處，游左無幾步．．．B1個氣瓶就漏氣，baba聲，我初時都唔知乜事，以為個reg漏氣，但係聽到D漏氣聲唔係前面而出氣，又望唔到邊樹有事（B1個氣瓶被佢自己擋著，無背向我比我檢查），當時我都唔知點做（B1仲屎，定左係處唔知發生咩樹），就係呢個時候，DM1撲住游埋黎一手按著B1，返轉佢望一望，就望到B1個氣瓶與氣喉接觸點不良（即係無set好gear，求求其其就算啦），DM1本想推B1返上船等佢再攪返好D儀器，但B1好似唔明DM1既意思，照跟我地游向前方與各人匯合，雖然此時氣瓶無baba聲既漏氣聲，不過有無問題．．．真係天知曉；最後人齊喇，DM1比手勢，各人就開始下沉。

一落水下降，我就發現B1個氣瓶不斷有氣泡湧出；雖然頻密，但照樣子應不造成危險，所以DM1望一望，就繼續放行。由於大斷層落差可由幾十米到二百幾米，因此落水前DM1已經講過，今次最高深度不能超過二十米；我地沿著大斷層不知不覺就不斷向下沉，由於今次視野很廣闊，水底很清晰，可以望到達二十米內的範圍內，情景就如同身處一個大水族箱內，各式各樣既魚類在你身邊自由自在，游來游去，真係好睇過海洋公園既水族館。

就在此時，F1無拿拿從後游埋過來，向我上下其手．．．我當時都唔知乜樹，佢又講唔到，我又聽唔明．．．我就係禁比佢在身上搜來搜去達二三分鐘之久；當時我真係想一巴聲過去，但在電光火石間，我又以為唔知佢有事，定我出問題，終於比F1繼續舞到domdom轉；最後，原來F1想攞我帶落水既麵包餵魚！

當F1攞出麵包想餵魚之際，我就游走左，等佢自己一個慢慢餵；於是我在水中跟著DM2一路游，一路拍短片。在大斷層上，有很多大珊瑚依附著，而且形狀獨特，顏色鮮艷，並且十分巨大，很多也如葵扇般在水中漂蕩。F1及F2就不放過此美景，不斷的打著閃光燈；當我在前頭一路欣賞珊瑚之際，B1和G1也從後趕上，加入欣賞行列。但由於珊瑚是生長在斷壁上，因此個人浮力要控制得宜，才不致於意外地破壞珊瑚；可惜B1和G1不知是否技術不足，定話大意不留心，有好幾次也差點一腳把珊瑚踢斷。我與DM2見狀也用手勢示意叫他們游開一點，但係佢地又唔多明，好在最後DM1捉實佢兩個，拉佢地開去“劈”更遠的地方。

幾個人集合之後又繼續前游，游下游下，我就發現在水底有條鯊魚訓左響處，我越游越向下，B1見狀知我發現有大物，就超越了我，游得更低；由於我當時帶有電腦在身，因此知道深度已到DM1所言既指標，但由於我想望多兩眼呢條係乜鯊魚，不其然又越游越低，接近三十米既深度（但與鯊魚仍有約二十米既距離），而B1又唔理四周既人，係我下面又想追鯊魚的游的更低．．．呢個時間，我個氣瓶比人‘當’了一下，我回頭望，原來DM1示意要我升水，唔好再沉落去，但我指一指B1，佢就示意叫我捉佢返黎；好彩今次B1慢慢下沉去追住黎睇，我游兩腳就可以捉住佢，如果唔係就．．．．．又大檸樂！

眾人回升到約二十多米的水平，就繼續向著原有的路線進發，但係無啦啦，B1係我面前出現，經著就自己游左上更淺的地方，我向上望，上面空空如也，乜鬼都無野睇，汪洋大海一遍，佢做乜游左上去呢？！最初B1係我頭上約五米處，跟著越升越高，越來越接近水面；我心諗，唔知佢係咪有事要緊急升水，此時G1從後趕上，見到佢既潛伴升水，佢又急升游係佢身邊睇下乜事，於是乎，下面五個沉人就係水底向上望下佢兩個做乜野，但係睇情況真係唔知佢地發生乜樹？！呢個時候，DM1又出手喇，佢示意DM2帶其他沉人前進，DM1自己升水睇下呢兩隻馬騮做乜！

我跟著DM2向前游，游不了幾步就停左落黎，因為四面已經楚歌，我地被鯊魚包圍；前面約八米處有一大條（好似幫手開路禁款），左面係斷層（無路走），右面遠處又有多條“活躍”既鯊魚游來游去（游得好快，似找食物）。由於前路受阻，所以我同DM2都停左響處，希望前面條鯊魚游走，我地先再前行；等左好耐，幾條鯊魚都係唔寫得我地禁，不斷在附近騰來騰去，攪到我地唔知點算；後來前面個條向前游左消失於眼前斷層，過左幾秒，DM2示意叫我唔好跟佢，企定定唔好旭，等佢去探路。

無問題，無問題，餵鯊魚呢家野我唔在行，都係你去先好ｄ，打個ok手勢比佢，DM2就游左去前面；幾秒之後，唔知邊處游左條鯊魚黎，向著我面對面游過黎，游過黎．．．死啦，游緊過黎，無路走，點算！？睇真ｄ，原來DM2靜雞雞追住佢，係佢後面拍緊片！我見條鯊魚左擺左擺，係我面前唔夠十米之處轉左彎游就左，仲算讓我放心。呢個時候，B1忽然出現於我眼前，佢見到禁多鯊魚，游下游下，佢又越游越開．．．嗱嗱嗱！你唔好再游開去呀，我唔會追你返黎０架！！！！！好在佢游左幾步就自動停左落黎；我地係呢個位再欣賞左一陣，B1因為氣瓶沒氣要同DM1一齊分享，於是DM1就計劃升水。（本來我唔洗升水，下文"特別加料"有提及過，現不多詳述。）不過升水既過程又係個幾個有問題，一支箭上左去唔三唔四，唔識做安全停留

上返隻快艇，我問G1剛才追住B1升水，究竟攪乜鬼？G1話見到B1升左上去，想睇下B1係咪有事，但又唔知佢做乜，攪左好耐都無結果，最後好辛苦拉返B1落黎。問B1佢自己知唔知自己做乜，B1話佢自己都唔知，無啦啦就標左上去，之後又落唔返。唉．．．真係麻煩!

跟著大家又七嘴八舌講下剛才下沉既所見所聞：

F1話係我身上攞左包麵包正想餵魚之際，就比DM1一手搶左充公，更用手勢表示唔得。

B1上岸後話比我地聽，呢次係佢第一次見鯊魚，而且好多條，當時佢好驚，心慌慌喎，所以停左響處（如果唔係，又走左去追鯊魚啦）

G1呢期又成日問我：『死啦，成日做唔到安全停留，有無事０架？！有無事０架？！』你叫我點答你丫，初級O仔時代已經學左既野唔記得，我邊教得你禁多丫，之前係車上都同你地溫習過，做唔做得足，真係睇你地自己技術喇。

船夫就去到B1面前，話佢唔開氣瓶而落水，會係水中氣絕身亡；叫佢留意及記得落水前檢查開氣瓶。

大家講得興高采烈之際，快艇開始行駛，我又問一個白痴問題（點解白痴，因為心裡已有數）。

8c9問DM1：『宜家會去邊?』
DM1話：『宜家先去吃午餐，然後再第三沉。』
8c9：『第三沉會去邊呀？藍角呀？』G1又附和話要去藍角！
DM1答：『睇下情況啦。』
8c9：『睇下情況，重要睇乜情況呀？』
DM1：『睇天氣．．．。』
8c9：『禁今日天氣好唔好丫？』
DM1：『嘛嘛地．．．。』
8c9：『嘛嘛地，即係掂呀？』（註：上水之後天色係差左，無左太陽，而昨晚我睇NHK，知道太平洋當時有兩個颱風已經形成）
DM1：『嘛嘛地即係去既機會會微．．．。』
8c9：『禁唔去呀？唔得，唔得．．．』
DM1：『去唔到都無辨法．．．。』
8c9：『你之前又話會去既．．．』
DM1：『宜家天氣唔好，藍角又係外圍，沒有任何摭擋，受風響影響，落水會有危險．．．。』
8c9：『真係有危險，你唔好騙我喎！』（唔好因為呀邊個邊個騎騎離離，就抹殺左我既願望呀．．．．）
DM1：『唔會騙你，不過受風向影響，今日真係不適宜去。』
8c9：『．．．．』
DM1：『我擇個其他沉點比你地啦。』
8c9：『靚唔靚先，我要多野睇０架。』
DM1：『得啦，得啦，我安排啦。』

跟著快艇停左係一個荒島上面，我地落左船，行去前方不遠處，那邊有涼亭長桌，未行到，就聽到有人講廣東話；我見那邊已經有一班人坐左響處，食完晒野，睇黎都黎左一段時間；聽到佢地既對話，都好似係去沉水既，不過唔知跟邊間。

一行人到達長桌，又未有野食，就走出海灘繼續玩水。而我就來來回回，掛住完水之餘又掛住影相；影下影下，有個三點式美女同我say hi，我望下佢，都唔識佢，不過佢個笑容好甜，於是我就停左落黎；

美女問我：『認唔認得我？』
8c9：『無乜印像．．．．』
美女：『我同你同一日坐飛機來帛琉，不過我係A團，你係B團；昨日係個島上面我認得你去攞食物．．．』
8c9：『哦～～係呀？！』
美女：『你地今日出去沉水呀？』
8c9：『係呀！』（見我重著住件沉水衣都知啦）
美女：『我地今日都係出海沉水呀。』
8c9：『你地都係呀！去邊樹呀？』
美女：『先去大斷層，之後德國水道。』
8c9：『同我地差不多喎。』
美女：『你地會唔會去藍角呀？』
8c9：『唔會，你地呢？』
美女：『我地都唔會去藍角，因為天氣差喎。』
8c9：『係呀，天氣差呀．．．．』（聽到呢句之後，有小小釋然，原來DM1所講既野係真既！）
美女：『你地見到ｄ乜呀？』
8c9：『見到呢ｄ，個ｄ．．．．．．．』

寒喧左幾句，美女個邊就夠鐘要走人，同佢say goodbye之後，我地既午餐就送到來了。

DM2把一批午餐飯盒及凍飲攞到黎長桌放下就走回上快艇了；我地以為個個午餐飯盒都一樣，就求其取一個來自顧自吃，點知，原來係有幾款：G1玩完水返來攞到最後０個個，一打開就叫：『嘩～～點解得禁小餸』，我望一下，丫．．．真係小左D，得三件大大件既豆腐！哈哈哈，我見佢好似好可憐禁，就比左塊牛扒同佢換左件豆腐。（如果佢唔講，真係無人知ｄ飯盒係有幾款）

食飽又去玩水，玩左一陣DM2回來收拾，我地又幫手（當地環保意識唔錯，真係乜都唔剩，全部有用無用都會攞走），之後一齊上船出發去第三個沉點。


"特別加料"
呢次有個奇遇，唔知點解個日有個義務潛水員(DM2)同船落水（因為我地包左隻艇出海）；初初我以為佢係職員，攞住部超大型水底相機跟我地一齊落水，一路游一路拍；又做埋“領水員”，帶頭去探路，總之一齊上水又一齊落水。

後來DM2想帶我去其他地方影多Ｄ野（其他人無氣要走先），點知我一游過去，就比野click住 ，如是者四，五次，游極都游唔到 ．．．．最後回頭望，原來個DM1以為我唔肯上水！我一游，佢就捉實我個樽 ．後來DM1打手號話比DM2聽叫佢放我走，我先可以游到過去，不過個時個樽已經開始無乜氣，要上水．．．好可惜啊。

之後回到dive shop, 諗住佢地會叫我地買返ｄ vedio, 點知．．．無人知有呢件事 。後來問多兩問，先知呢個唔係職員，係國家地理雜誌的特約攝影師 ！！！佢今次黎係幫國家地理雜誌影特輯，但要個幾兩個月後先開工，不過由於有時間，佢就一齊落埋水。

當時我地四圍搵佢（因為上水之後我地掛住執野，換衫．．．．），問左一輪先知DM2係邊，於是同佢傾買vedio既事，由於佢志不在此，因此象徵式收了一些費用。本來個晚佢會送隻碟黎比我地，點知後來佢部機壞左 ，所以燒唔到 ，宜家要等佢寄返過黎比我地 ，到時真係要睇下自己上唔上鏡。 所以幾年前我就同自己講，每次出遊都會有奇遇！

2005帛琉之旅 之 十

第一沉

我睇下風景，晒下太陽，不知不覺就坐左成個鐘，隻船又經過德國水道，我地見到又嘩嘩聲。之後，我發覺隻船既航道好似熟口熟面，跟著無幾耐就停左，之後DM1就同我地講，第一站已經到達，今日第一沉點　－　德國水道。唔係化．．．．我最唔想去既．．．竟然去左；不過算啦，因為昨日和P1和P2傾過，佢地話由於第一次出海沉，因此DM會擇一個容易既位比沉人下沉，看看他們的技術，再決定之後比唔比佢落水。

在船上，風和日麗，水清沙幼，一望就可以望落水底。浮沉既朋友好快就跳左落水搵獵物；而我一到站，當然快手快腳著晒成套裝備等落水啦；其他人都唔知係唔係好耐都未著過件衫，攪來攪去都攪唔掂。之後DM2就一早跳左落水底等，我就坐係船邊等呀等，又被DM1催促我快D落水；當個個著好晒GEAR之後，無人肯落水喎～～～，唔係化，D水又清又無流都唔落。於是B1，G1，F1及我董董董跳晒落水，而Ｆ2猶猶疑疑，唔知想點，而G2重慘，企向船邊唔知點落水禁。DM1再催促佢地快D落水，之後Ｆ2和G2就跳埋落黎；唉～～～點知兩個人都無做好準備就跳，終於落左水之後就嗆鼻，咳到收唔到聲。當兩人順返條氣，DM1就發訊息提示眾人下沉；B1，G1，F1放氣放氣就沉左落水低等，F2和G2在水面又唔知做乜落唔到，DM1見勢游埋去幫F2，F2就順利下沉，而G2反壓好似有問題，遲遲下降不了，因此好麻煩！而我就係水面附近睇晒成班人的姿勢都唔沉下去；最後DM1用手勢叫我快D沉埋落去等，我就快速放氣沉埋落水底同B1，G1，F1，F2會合，不過下沉時，見到G2雞手鴨腳，反壓好多次都做唔到。

當我沉到底之際，下邊幾個已經開始等得不耐煩，周圍攪攪震，攪到海沙四起，於是我用手勢叫佢地定落黎；後來G2與DM1來到，DM2就帶頭出發，我和F1跟第二，B1和G1跟第三，F2和G2就全程受DM1保母式殿後。

我地跟著DM2四圍游，一路游一路搵龐然大物，只見四周空空如也（真係不出我所料，無估錯），我回頭望F2和G2，只見F2掛住搵野影相，而G2就戰戰兢兢，DM1唯有全程睇實佢，寸步不離。

游下游下，久不久都會見到一些細小既水中生物和珊瑚，但不太吸引我；每當我見到有趣的東西，我都會停下來，等F1趕到來影下相，留為記念。由於越沉越深，去到二十多米，視野即時由15-20米跌到5米，而且水質有小許混淆，因此我跟實DM2，以免迷失。而其他人游得更慢（實際係佢地唔知做乜周圍游，唔跟貼大隊），所以我同DM2時常都要停下來，回頭望加等一等。

約下沉了二十分鐘左右，我同DM2突然停左落黎，因為有好野發現，而且由遠而近，初初由於視線不佳，所以估唔到係乜，但不出數秒，隻海洋生物就游左過黎。哦～～～～原來是一隻大海龜！隻海龜爬下爬下，就游到我地面前來，DM2舉機即影，當我想游過去海龜邊時，佢已經嘬一聲在我身邊游過；此時F1及F2趕到，舉機拍都黎唔切，跟著B1和G1游到，見我地停晒係處，先向外一望，才能同隻海龜有一面之緣，我地眼見隻海龜游走，真係有小小失望！點知係呢個時候．．．．B1想摸隻海龜，唔成功；跟著舉機想影相，隻龜又游走，就係禁．．．佢作出一個錯誤的決定，就係轉身追住隻海龜游！我見狀，即刻動身想捉住佢，但點知我同佢相距成四至五米，我來得反應，跟本就唔夠佢轉身即時游得快，不出二秒之內，B1就消失於我眼前，我游左幾步就停左落黎，因為以為佢見到水底視野不清而會當下停下來，點知係無喎；當時DM1曾經發出訊號多次，但B1完全沒有聽到（無錯，係聽到！因為DM1發出既訊號係有聲響既）。G1由於係佢既潛伴，見我停左落黎，G1就追上去，希望追得返B1；而其餘四個沉人，就各自不動，等佢兩個再出現我地眼前，但等左一陣，都無乜動靜，於是DM1出手，即時游去B1和G1的方向，希望捉返佢兩個返黎。我地由於唔想分散，於是唯有原處而等，但等左好耐，我估有五分鐘以上，都無晒佢地下落，無所事事，都唔知做乜好，係禁兩腳０也０也，係個水底處盤旋而立；後來都唔知等左幾耐（我無睇錶，不過時間都真係唔短），DM2就用手勢向我地示意跟佢前行，我地見狀，就繼續我地的沉程。

五個沉人往前走，不時看見大大條既神仙魚，但數量不多，致於珊瑚，也就比較失色；當個沉程接近尾聲，我就看見G1、B1和DM1唔知幾時已經回歸大隊，跟著我地一齊在適當高度做安全停留；但係唔知做乜，幾件沉友都標水上左去一個唔合適既地方，佢地見我，F1，DM1，DM2係下面，就浮浮沉沉唔知攪乜鬼，又用腳０也，又用手撲，想落又落唔返，真比佢地激死(我估係佢地調較不適的浮量，因此標左上去，落唔返來)

就係禁，當時間夠，我地下面０個幾個就做手勢叫佢地一齊上水面。上左水面，就爬下爬下游返快艇，由於其他人上水慢，攪到我係水面浸左好耐先可以上船，上到船後，就除下儀器想換新瓶，點知幾條友仔攪到一地都係儀器，行都行唔旭。我就坐左落黎休息休息。

原來去浮沉既團友一早上晒船等我地呢班沉友，之後本來諗住問下我地有乜好東西係水底發現，但見佢地雞手鴨腳上水，上左水之後見G1"坦"左係張椅處，面無血色，面青口唇白，又唔出聲講野（呢個至出奇），明眼人一睇就知有事發生，所以班浮沉友就無問問題；當我坐低（我和G1同一卡位），G1就叫我唔好旭到佢，佢話好暈，好辛苦喎。

我坐回船邊既位置，G1坐走廊邊，我一邊晒太陽，佢一邊坐係處，無幾耐，隻船就開走。過左一陣，G1話要跟我換位，因為佢有ｄ唔妥；換完位無幾耐，G1就餵魚．．．．。過左一陣，G1開始有D氣息，坐返起身，我就唔知去左船尾攪乜鬼，忽然KS1及C1走來問我水底下有乜野睇，影得多唔多相，我話麻麻地，唔太多好野贂；而佢地也表示浮沉時乜鬼都無野睇（嗱～～～我直覺幾準丫，都話無野睇，係都要黎呢處）。

跟著KS1問我發生左D乜樹？我話有乜樹發生呀？

KS1就話：『你無睇見咩？』
8c9：『睇見d乜先？』
KS1：『你地個DM一上黎就狂炳！』
8c9：『狂炳？！』
KS1：『重炳緊呀！』
8c9：『邊樹呀？』
KS1：『船頭！』
8c9：『啊～～～』

於是我行返去船頭，見到DM1和B1；我未行到去，B1就向我方走過來。

8c9：『做乜呀？』
B1笑笑口：『．．．．』
8c9：『比人炳呀？』
B1笑笑口：『係呀！』
8c9：『我都估到啦。』
B1：『係呀，不過都係我唔岩先既．．．』
8c9：『你知就好啦，唔好再有下一次喇！』
B1：『唔會唔會，唔會再有下一次．．．』

返到船中，G1好似無乜事，其他人也安然無恙，於是各人就七嘴八舌講述剛才下沉的所見所聞，我有小小不安，所以無乜反應；G1問我做乜唔出聲，我話出乜野聲丫，攪成禁，我既心願一定達唔到．．．．．你地要賠返張機票比我再來過（老實講，呢個時間，我心裡有數，想去埋我想去既其餘兩個地方下沉．．．應該唔得喇）:(

G1聽到繼續安撫我，話無問題既，第一沉落水，係禁上下Ｘ，我就話睇見你地D技術，比我係DM都唔會帶你地出海啦．．．．．剛巧DM1行過，我問下一沉點在那裡，是否藍角呢？DM1回答話佢會有安排，G1附和著也要去藍角，但DM1不置可否．．．然後話下個潛點係大斷層，潛完之後先決定去唔去藍角。

唉～～總算有一點點希望，但我仍然有預感今次的沉程會比人打誇．．．．

2005帛琉之旅 之 九

第四日 (上半)

早上起床吃早餐，忽然KS1話呀邊個昨晚話唔去，不過今朝又話去喎！我真係無佢地符，又唔可以講ｄ乜野，所以繼續吃餐。此時G1走過來同我講，話G2原來得個O仔牌，仲經驗唔多．．．所以我有小小心寒，因為昨日自由活動時，我同G2傾左幾句，知道佢個O仔牌係外國考既（當然我知呢一個係唔多掂既地方），而且重要爛尾跟著返ｈｋ考埋其餘項目，基於再後無時間傾埋落下，所以實際技巧如何，我都心理有數，但由於佢係G1叫埋來既，而且又就黎出發．．．我真係無野講！

吃飽早餐落樓下等車，沉水店既專車好快就到，由於無啦啦多兩件，本來兩架七人van岩岩載好晒，但宜家就要迫迫夾夾。

在車上，各人心情興奮，但我怕樂極生悲，所以問下佢地幾個問題，點知．．．．個個都唔記得晒ｄ安全守則，例如唔識補氧氣數量（即幾多個巴），又唔記得安全停留時間及米數，真係聽到都一步一驚心。我用最短既時間講左幾句比佢地重溫，點知G1就懶呀蛇無教．．．唔係化．．．你邊處執個牌返黎０架。

坐左唔夠十分鐘，就到達沉水店，大家攞齊行李落車；一入到去，就要簽一張幾篇紙的什麼聲明同意書，之後查牌；點知．．．原來一個有帶牌既放左係酒店無攞出黎（禁你帶黎做乜呢），而B1一早講過話無帶，所以昨日已經係電話處留底左佢既個人資料，等沉水店幫佢查核。

簽完紙，有幾個人就衝出去擇沉水儀器，我就繼續留係沉水店．．．點知，有個職員問我攞沉水准許證，我眼一，就轉向G1，G1望著我，口啞啞！
8c9：『乜你係電話處無問清楚詳情咩？』
G1：『佢地話全包嘛！』
8c9：『全包？！即包唔包准許證呀？我之後咪有同你講左沉水又沉水准許證嗎？』
G1：『我知你有講，不過無諗過佢捉得禁嚴嘛。』
8c9：『我都講左呢到係一定需要，如果唔係就唔會間間沉水店都標明實價啦。』
G1：『鬼知佢會問我地攞喎。』

於是，G1就出佢既交際手腕，又求又‘也水’希望過骨。不過當然唔會有奇蹟，工作人員絕不放行，除非我地買過張新既；於是佢就提議不如問當地導遊攞，我話我地呢幾日都無沉水，佢點會有准許證呢，而且我地又無佢電話，正當浮沉人士與我地哀思之際，F1及F2擇完儀器出來，佢地知道事件，就話之前有問當地導遊取名片，剛巧又有帶在身邊，所以有電話打比佢。一聽到呢個消息，各人也懷有一線希望．．．．最後聯絡得上，當地導遊答應把准許證搵人帶來比我地；雖然擾讓了幾十分鐘，又要多等十數分鐘，但知道成功，當下也鬆了一口氣。不過此時G1埋怨為什麼佢昨晚同當地導遊講過話去沉水，而當地導遊又不主動交出准許證，由於我不是個中實際對話者，所以不加評語，幸好最後都可以省回15蚊。

之後本來我去擇儀器，但一場黎到，點都要同人打個招呼，於是去搵我之前貓開個主持人傾兩句；say 完hello，寒暄數句，佢就比左一個壞消息我，佢話由於有個沉人無帶牌又無帶簿，上網上左兩日都糸統故障，查唔到佢資料，所以佢唔可以出海沉，致於另外一個話宜家返左酒店取，如果攞到返來，主持人話都可以比佢落水，（不過F2岩岩擇完儀器，我都無聽佢話返去攞返個牌，何來去左酒店呢？）。我收到消息，當然要話返比當事人聽，點知佢兩個愛理不理，話一於照出，唔洗理喎。唉～～人地一心為你地好，有規有矩怕有意外，你地咪當耳邊風先得０架！

真係無辨法，於是我去擇儀器；擇完返出黎，個十幾個准許證就運到黎了，我交比有關識員帶上船上，於是差不多可以出發了。

當每人都取齊物件及儀器，就帶上船上準備出發，點知B1又唔知走左去邊。當B1出現眼前，我問佢：『主持人係咪唔比你出海呀？』B1：『唔知呀，好似係掛，佢叫我去浮潛喎，不過唔緊要啦，出左海，就做乜都得！』於是B1落埋船就真係開始出發喇。

由於船上有三個工作人員，我當然首先問誰是水底下的首領啦（DM1）個黑黑實實的男人回答我，他就是首領。於是我再問，有幾多個首領一齊睇住我地六隻馬騮，佢話佢一個攪掂。我有小小擔心，於是就話比佢聽有人經驗不足，可能人手不夠，但DM1答我應該無問題，而且有個外緩會幫手（DM2　－　即先前文章提到的攝影師），叫我放心。之後我問DM1，今日潛點係唔係由我地訂，佢話係，無問題。於是我就提出要去藍角，藍洞及大斷層。點知G1貢出黎話一定要去德國水道睇Manta，DM1答去德國水道無問題，不過睇Manta．．．宜家靠運氣啦。DM1答完之後就話唔洗擔心，自有安排。

係船上，真係唔洗粗心，事無大小都有人幫你跟，例如安裝儀器，測讀數．．．全部都有船員及DM1幫你一腳踢，真係坐定定，等落水，超級嘆！

2005帛琉之旅 之 八

沉水附加資料
以下是一般沉水參考價錢

Scuba Diving:

Full day diving (2 tanks) boat leaves 830am $110.00 pp
2 tank dive + 3rd dive in Chandelier cave $135.00 pp
2 tank dive + Snorkeling at Jellyfish lake $135.00 pp
Afternoon (2 tanks) & Night Dive * $165.00 pp
Peleliu 2 tank dive * $135.00 pp
Peleliu 2 tank dive + WWII land tour* $155.00 pp
Additional 3rd dive* $40.00 pp
Night dive* $60.00 pp

Snorkeling/ Rock Island Tour** $90.00 pp
Boat ride $90.00 pp

Canoe/ Kayak Trips:
Full day trip (w/ lunch, drinks & guide) (different trips available) from $85.00 pp
Canoe/Kayak rental $25.00 pp/day

Gear Rental
Package (BCD, Regulator, Mask & snkl, fins & Wetsuit) $35.00 pp/day
BCD $12.00 pp/day
Regulator $12.00 pp/day
Mask & snorkel $5.00 pp/day
Fins (with/without booties) $5.00 pp/day
Booties $5.00 pp/day
Computer $25.00 pp/day
Din Adaptor $2.50 pp/day
Manifold rentals $12.00 pp/day

Koror State Diving Permit (conservation fee) $15 pp is not included, valid for 14 days.
Peleliu State Diving Permit (conservation fee) $20 pp is not included, valid for 14 days.

2005帛琉之旅 之 七

第三日 (下半)

玩完水戰之後，隻快艇就啟程去牛奶湖，坐船約十多分鐘就到達。當隻船停駛，當地導遊就攞住塊浮版跳落水，‘畢’ｄ海底泥上來；一放下ｄ海底泥係甲板，幾隻爛玩精就好‘侯琴’，將ｄ泥查上人地個身、面、頭．．．一時間，成個船艙開始大混戰，你又笪我，我又笪你，真係睇見開心，玩既笑死。幸好當時我做戰地記者，幸免於難（幸災樂禍就真），一ｄ都無受到污染；不過成個船艙就戰績輝煌，污穢不堪（洗死個船長就真）。

過左唔洗十分鐘，個個都話乾晒喇，乾晒喇，要跳落水沖身。有ｄ人諗住海底泥美容正，所以想‘畢’ｄ返屋企慢慢用，正當做壞事之際，就比當地導遊發現，最終要放棄‘擄泥’行動（但我地唔知點解，佢話海底泥係唔比出口既）。

之後大家繼續玩水，期間B1及KS1想用鬼計拉我從船上落水，幸好我出一招“飛毛腿撥水大內移”，嘿嘿嘿～～～攪到佢地知難而逃，力保不濕！

又玩左一陣，就回程喇。返到酒店沖身之後，大家就相量明日沉水的安排，由於我在出發前已經同有關沉水會聯絡，因此心中有數。但G1由於同其中離團去沉水既團友（以下稱P1和P2）問過料，因此又再發表意見。

本來我諗住五條友問好價錢join沉水會出發去沉水就算，點知G1話G2又會來，呀C1, C2, C2, C4又想去，呀KS1和KS2又可能會join，講下講下，差唔多成村人都去？１由於我唔想妹仔太過主婆，話到底，旅行團一定會比ｄ收費活動ｄ團友係自由活動日參加，如果個個都跟我地呢邊，我怕我以後都參加唔到呢類超值團。

我一心以為人小小就算啦，唔好攪禁多野喇；點知G1話佢答應左人，推人唔好喎．．．啍～～～真係吹脹，攪到我地出來hea既做埋人地領隊個份。之後我話我去沉水我諗住去藍角，藍洞及大斷層；點知G1話唔得，佢沉唔到呢ｄ地方，要ｄ簡單ｄ，容易ｄ，又話唔可沉得深，又話要睇manta，所以要去德國水道！大佬呀，無做過功課就唔好出外沉啦，今時今日今個季節邊係睇manta呀，之前路經德國水道，我都覺得水底唔太好feel，不過佢死都話要去，真係激死。

之後我地再擇沉水店，佢又話呀P1和P2個間唔錯（乜你去過咩），後來我發覺呢間係我之前有同佢地e貓聯絡過，所以都可以嘗試打電話去問一問。最後確定人數，六個沉水，六個浮沉，於是打電話去問價錢。

由於人數也不小，而六個沉水人又想盡興，再者我早前計過上水後既平安停留時間，因此計劃沉三樽，於是同沉水店相量價錢。首先沉水店回覆我地如下所列既附加資料的每項公價，即沉水者110（兩沉）＋40（加沉）＋35（儀器）＝185，而浮沉就90。

在你價來，我價往，反反覆覆，傾來傾去，最後我地終於傾掂左沉水110全包，浮沉者60攪掂　（睇到呢到，無同我去個D係咪又dup多次心口呢？）

而潛點由我地定，明日去到沉水店確實。

攪掂晒就落去吃晚飯，不過靜雞雞同明日出遊的人士講，如果當地導遊問起明日我地會參加佢ｄ乜野活動，就自行找藉口迴避。

食食下餐，就見當地導遊逐枱問明日參加什麼活動，我見C1, C2, C2, C4及其餘四人也好辦事，沒有透露口風；點知去到G1個枱（我坐係佢後面個枱並且面向佢），就聽到佢同當地導遊講明日去潛水，當地導遊又問佢要幾多錢，跟邊間．．．．我見佢大口大口想說出來，就揮手向佢示意唔好講（因為當地導遊報比我地個價係公價，而我地自己bargain個價又真係平好多，所以唔好意思比其他人知，費事佢地嘈個當地導遊），但佢見到我示意都繼續口upup，真係無佢符！之後當地導遊來到我張枱，我同佢講我地三個明日想休息，不參加活動了．．．禁就過左關。

之後見個當地導遊問晒其他人走左，我就過去同G1傾，問佢講左ｄ乜，點知佢話乜都講晒？！仲比個導遊讚，話個價錢全包好抵。唉～～剛才叫你打電話去沉水店就ee鵝鵝，講到九唔搭八，點知八比人地聽就眉飛色舞。

明日既行動準備好，約好集合時間，晚上就各自找節目。

2005帛琉之旅 之 六

第三日 (中場)

當我地在船上回氣之際，隻快艇就以高速飛馳載我地深入一個無人小島；呢個小島被群山包圍，真似世外桃源；而且上船的地方有一小小木造碼頭，好鬼精緻。

落船後，又來一個briefing；首先我地要係險峻的山路上行走十分鐘才能到達水母湖，而路途上真係寸步難移；由於受地殼變動，以前沉在水底的珊瑚礁升了出地面，而形成水母湖，但珊瑚礁並不平坦，先上山幾分鐘，行一段小平路，跟著再落山行幾分鐘就到喇。雖然路程短，但山路難行，一個不小心，就會頭破血流，手腳花晒，而且路旁有毒樹毒草，所以一個跟著一個也步步為營。註：雖然著住水上活動既boot，但都好’un’腳。

終於力保不失，行到入去個木造浮台，由於內裡沒有地方可放置東西，因此除了潛水用品，其他的物件不用帶去；有些團友要除下眼鏡，放在一旁，但地方淺窄，好容易被人不小心踏落水也不出奇，幸好最後回程時，發現全部也安然無恙。

出發入湖之前，當地導遊千叮萬嚀叫我地入到湖來記著唔好著住蛙鞋來踩水，以免水母受傷，以致即時死亡。但好似無乜人有留意，所以又董董董董落晒水，游出湖中心。

由木造浮台游大約十分鐘先至去到外圍，再游出小小，先會見有零零星星的小水母，一浮一沉在湖中游來游去，吸收陽光。由於ｄ小水母十分可愛，因此很多人也興奮雀躍，也不顧其他人及湖中水母，fin來fin去。雖然我頭在水裡，但看見水母被其fin打得七零八落也很心痛，於是我浮出水面大呼：『喂！（都唔知佢係邊個，叫左先算），你游水可唔可以細力ｄ，ｄ水母比你一腳打死晒喇！』好在呢個人聽到，動作慢左落黎。於是我地在水中暢遊，慢慢游，慢慢睇；後來發覺游出ｄ水母重多，多到包實晒你身圍，不過睇黎睇去，好多都好細隻，如一蚊硬幣般大，只有小數大過拳頭。

中途發生兩單趣事，話說大家各自各在湖中游來游去，忽然
B1和KS1異有同聲問G1：『你有無跌左隻fin呀？』
G1答：『無！我有無跌fin！』
B1和KS1再問：『你真係無跌左隻fin？』
G1答：『無，我重著住。』
如是者問左幾次，都同一答案，後來B1從水中伸手出來拿著一隻fin，G1見到再望下隻腳．．．呵呵，如來佢跌左隻fin都唔知道，好彩比B1及時捉實；不過B1就慘喇，因為剛才G1一腳click埋去個頭處，攪到佢個面罩脫落，直入水底深處，KS1見勢都幫佢執唔返，不過呢一下G1隻fin跌左出黎，B1就幫佢捉住。

玩左成個鍾，我就游返上水，上到水原來好多人已經回船，不過原來F1和F2仲未上水，於是我要洗出一招“返來啊，返來啊！”招佢兩個魂魄返來；最後攪到我地三個最慢回到船上，好彩當時其人係船邊打緊水戰，無投訴。

重點提示
不過在整個過程中，我同朋友都大呼過幾次，叫人唔好亂踢亂游，但有ｄ人聽到，有ｄ人扮聾。講小小歷史先，多年前水母湖生長過幾百萬隻水母，不過可能開發過度，又或人為破壞（以上例子），因此數量劇烈下降，現時剩返約百萬隻，可能更小。幾年前當地政府曾經封湖兩年，以保生態；所以現時開返，也要珍惜愛護；但我就發覺不小香港人及台灣人最為不守規則，不理死活，係又踢，唔係又踢，叫住都唔聽，好痛心呀！！！！！

2005帛琉之旅 之 五

第三日 (上半)

今日行程又比昨日較遲出發，所以理應唔洗早起身；不過天氣好，我一早起來吃完早餐就出去影相，影完返黎夠鐘上車走人。

又是昨日的快艇碼頭，眾人一落車，就攞齊裝備再落船；本來各人都以為坐返昨日艘快艇出海，但點知原來昨日有團友離團，今日join返一齊玩，所以隻船好似唔太夠坐。行得快落左船０個ｄ當然坐定定，乜都可以唔理，但係未落船０個ｄ就企係碼頭乾晒等落船；當時導遊於是同船長溝通，就騙我地話呢隻船已經比人book左，要求我地上岸坐第二隻！嘩，一上一落，一定到時成村人打崩頭，所以我地就罷坐，仲越坐越過，並要求佢加多一艘快艇出海。

最後群體力量，佢地（當地導遊＋香港領隊）都答應我地要求，不過成個碼頭已經無晒快艇，雖要急call求船，不過要等一點時間。在船內，因有人按捺不住，又覺得浪費光陰，加上天氣熱，無海風，因此不停鼓譟；過左成十幾二十分鐘都無船，於是有人走落船同當地導遊講不如開船出發去，唔好唔夠時間玩。

但如前所說，呢個團係來自五湖四海的遊人，因為有人比左成七千幾蚊正價參加，所以有要求要是合理的。後來當地導遊來安撫，此部份人士要求只要載客不出標準再加強安全航行，就答應坐迫ｄ都無所謂；就係敢，我地遲左成個鐘頭，成為最後一艘快艇出發。

今次坐船就要成個鐘先去到第一目的地　－　長灘島，但沿途雖然只係海與天連成一線，但海水的碧藍，已經叫人心擴神宜；而且途經德國水道，個種震撼，無法形容。

長灘島雖然只是一個小島，但對外的海面方圓數百公尺，也只是水深及腳踝，所以行到很遠也不覺得身在海中。由於我掛住影相，正當放下相機出外行長灘散步之際，而接近中午，潮水正緩緩水漲，走不了多步就水深至膝，越來越難行。於是就臥係水中玩水就算了。浸左一陣就返上岸吃午餐，如昨日一樣，有個不同口味既便當＋雞翼＋牛仔骨＋魚湯＋生果又一餐。

食飽又出發，今次去我期待已久的大斷層！隻船好快駛左三十分鐘左右就到，去到附近，隻快艇開始慢駛，而且遠處已經見到有多隻快艇泊了在那裡，可想而知呢個景點有幾出名。坐係船上，就知道海上大流，於是當地導遊作了個簡單簡報，眾人又董董董董跳晒落水；由於今次係逆流而游，所以都需要不小體力，如果稍一不出力，就會流向遠方。

今次我同F1拍住上，一路浮潛一路影水底相；水底能見到頗高，約有十多米，但向下望而深不見底。水中有大大小小既珊瑚魚游來游去（佢地既學名我唔係太熟，不過種類頗多，色彩斑斕），而且在水面幾米下，（即我地身邊附近）就有大蘇眉，而且還有六七尺既鯊魚　－　唔洗沉水都可以見鯊魚，利害！後來我取出麵包想引條大蘇眉游上ｄ影相，不過佢始終有禁忌，唔上又唔落，只係我地腳下約二米處打圈的游呀游，等得我好屎心急。由於我手上有糧食，所以吸引了很多很多珊瑚魚前來，跟著你一啖，我一啖，連我隻手都埋，真係縮都縮唔切。我地兩個玩我好開心，都無理身邊ｄ人游左去邊，剩係記得頂流，影相及餵魚；當我地樂而忘返之際，我抬頭一看，啊．．．．成村人已經游到一里遠，並陸續上船。我返回頭提醒F1唔好掛住影相夠鐘要走了，但係魚真的太多，好唔捨得離開，最後我把身上所有既麵包送晒比Ｄ魚，就捉埋F1游回快艇。

水流頗急，上水時跌跌撞撞，都幾狼狽；上船後除下面罩休息一會兒，當地導遊就點人數．．．．點知．．．．小左一個！睇真Ｄ，原來係F2；嘩～～當時心知不妙，唔係比鯊魚帶左佢去玩呀？！由於F2游術不精，我與F１都幾擔心，係船上，真係想搵個西瓜拋落海叫佢返來！幾個人大叫F１個名，都無返應，後來其他船既人都差不多上晒快艇，我地先見到有個茂利仲響水處浮潛，望下個mask同泳褲，應該係F１，所以成船人大聲呼叫，好彩合眾人之力，佢終於聽到，之後慢慢游返來。

2005帛琉之旅 之 四

第二日

今早食早餐，到餐廳時我兩個朋友F1和F2已經坐定定等緊我。剛巧G1坐我地後面張枱，佢一見到我，就話拍左我成晚門都無人認，打電話來又無人聽，問我去左邊（０下，要我向你交代？！），我話我可能ZZZzzz左變豬，門口又無金執，所以隻唔肯起身 ．．．． （後來我發現酒店ｄ電話聲仲細過手提電話既震機聲浪，你話點聽得到丫）

講左幾句，早餐送到，於是各自吃著，事情不了了之。

今日由於係本地遊，吃完早餐，成村人一齊坐旅遊車出發前去碼頭上船，由酒店出發約十分鐘車程左右就到達。一到步，無徒潛而又租左的團友去取物件，然後一人一件救生衣，就分配眾人乘坐三艘大快艇出發。約四十五分鐘，就到達其中一個洛克群島既小島岸邊浮潛；島上水清沙幼，藍天碧海，珊瑚多多，魚仔處處，不經不覺就玩到中午。

一上水回大涼亭，一人就有一個便當做午飯，再加先前島上職員整好既成箱BBQ雞脾及豬扒，不出十分鐘，就全部掃光，之後加煲魚湯和生果，一個完整既午餐就禁放左入肚內。

吃飽又出動，行去島的另外一邊浮潛，不過呢邊比較淺水，又乜珊瑚魚睇。過左一陣，當地導遊就在岸邊猛叫“返來啊，返來啊！”催眾人上船出發去下一景點。

又坐左三四分鐘船，去到對面小島，駛入其內，把船泊好。噹噹噹，噹噹噹，個個已經急不及待下水了；呢個位置係百年干具城，水底下有十數隻巨型大蚌，隻隻成米幾二米，活生生；不過我無游到落水底摸ｄ大蚌，怕佢地一口‘甲’住我隻手，所以只係係水面浮呀浮，望呀望；禁又玩左成個鐘，要走人。

之後又坐船去某個島既硬珊瑚區，呢處海底下好多硬珊瑚，美景猶如花園般花團錦繡；最利害是有一朵型似玫瑰的大型硬珊瑚藏於約四米既水底下，“許許”如生。而且水底下有三條大蘇眉聚居於此，佢地又唔怕人，所以人和魚一樣，在水內追逐嬉戲，游到我無氣就真。再者我用麵包餵魚，吸引了不小大大小小既魚群游來，一時水涉不通，人與魚群共存，好enjoy啊！

玩到唔想走，又被當地領隊吹雞叫停走人，有小小依依不捨。隻船又再航行十多分鐘，去到一處有軟珊瑚的地方停左落黎，跟著眾人又跳落水，游向一洞穴入口處．．．．

由於水漲，洞口唔係剩下好大的面積，不過游入去是無問題既；洞內洞外有溫差，就算我著住3mm wetsuit，都仍然感受得到其寒意。洞內如天然大泳池，洞頂全天候露天，雖然有陽光照射，但水積混濁，視野不清，能見度不太高。我浮下潛下游左一段路程，只是發覺最多軟珊瑚的地方，就是入洞口那遍陰涼地，所以回頭是岸，游返出去望多兩眼，就上船休息。我諗很多人都覺得洞內無什麼景觀，所以人群魚貫游回出來，在洞前那遍水內浮潛看魚毛；當地導遊見好多團人都上回快艇，就繼續下一景點　－　山中湖。

船程不太耐，約十多分鐘就到達了；我往水內一看，只見一件大大舊的廢鐵橫躺於十幾米的水底下，由於唔係成隻船的外觀，只是某一部份，所以我都唔知係乜東東，不過猜想是船頭既半邊。落左水約十分鐘我就回歸快艇，不過其他人興致勃勃，繼續潛下去望個夠。

大約三點半左右，船隻就歸航回碼頭了；四點半左右就返到酒店安頓，跟著沖涼休息，然後晚飯，食飽後自由活動，禁就過左一日喇。

在晚餐其間，G1發揮其交際本色，發現原來今日有團友離團去沉水，於是佢問人詳情．．．．

2005帛琉之旅 之 三

第一日

飛機準時起飛，坐四個鐘頭，就到達目的地，出發前已經收到風，當時海關係唔比帶食物入口既，差不多個個都會搜行李，連餅乾都不能幸免，抽起充公 。

但我又怕個兩日本地遊包既餐飲唔岩食，又怕食唔飽我，於是我就靜雞雞買左一批零食，然後分散投資，幾個人合力運佢入當地，費事到時我一個被人查時全部充公 。

當地入境處工作真“他條”，成機人落機（約七十人），入境處工作櫃位得二個，唔掂，大排長龍，於是個食蕉自己開埋第三個櫃位疏導，都攪左成半個鐘先過完。

而且我地又係差不多係最遲個幾個過入境處，一過完入境處，就當然係行李，不過我地個幾件重未出，其他人已經去到海關等出門口。正當我等行李之際，就見到每條海關既通路都係處搜緊行李，真係一行埋去就捉住黎搜，我見到都有ｄ心驚驚 。

望左兩望，我件行李就出，我朋友個兩件重要等，於是我就話我出關先，一路行一路望，望下邊個仁慈ｄ，手鬆ｄ，行下行下，有個官員開左條新通道，並示意我前去，心內戰戰兢兢行埋去，比左張過關申報字，佢就問左我三個問題．．．．．然後就笑笑口放我走，重同我講”Welcome to Palau，哈哈哈，開心到我丫。

原因
第一：唔洗比人扣起ｄ零食，正
第二：唔洗比人返箱倒晒ｄ野出黎搜
第三：唔洗搜完要執返ｄ行李
第四：唔洗三十秒就過到關

真係超級爽！！ 洗乜講，靚女當然著數ｄ。唔好嘔住，嘔左我唔再打後記０架。

我既朋友好快就出埋關，問佢點解，佢話見我過得禁順利，當然跟我走個條通道，終於都係唔洗搜，直出。

我地去到當地出左海關，就去info左ｄ資料，跟著就有大大架旅遊車係定門口接我地，我地三人速速上車。上到車，由於重有人係海關處比人搜緊行李，所以要等齊人先可以開車。

於是我地三個睇下剛才既資料，傾下去沉水的地方，諗下點樣編排時間；講唔夠幾句，前面個女士就搭咀（於是惡夢就開始了） 。

個女士一知道我地來沉水，就歡天喜地來搭訕，又話要受埋佢玩．．．我個時真係唔係幾識應佢，佢真係太熱情，有ｄ受不了 。

原來佢係兩個人來玩既，（以後簡稱G1及B1），又係來渡假，又想來沉水。我見大家呢幾日都會朝見口，晚見面，所以都無乜所謂，一齊玩未一齊玩law。

呢個時候，人齊又上晒車，開車喇！

在車上，有工作人員自我介紹，話佢係黎緊呢兩日帶我地去本地遊既導遊，又多謝參加佢地舉辦的旅行團等等等等。我地都無鬼心機聽，繼續研究去邊處沉水。但主持人忽然提高聲調講話，吸引全車注意：『大家周車勞動，係咪好肚餓呢？今晚行程既晚餐係唔包既，所以我地不如先去食飯，然後返酒店。』『黎到帛硫，魚產豐富，今晚大家可以去吃海鮮餐，二十五美元一位。』

我諗剛才食完個飛機餐唔夠兩個鐘，都未落下隔，而且第一日就食得禁豪，幾時食到走個日呢？所以我想趁早出去市區八下，行下加認路，所以我同朋友就相量唔去食晚餐，自己周圍行。點知前面個兩個聽到又話要跟埋一齊，後面有兩個又話跟埋我（都唔知做乜忽然多左一班fans），於是我地幾個就提出返酒店先唔去吃晚飯。羊群心理，一有人出聲，就有人和應，最後全車人都返酒店，跟著自由活動。

註：本來我地要加單人房附加費，後來好在有人參加，最後分左與我同房，所以唔洗加錢。

去到酒店分房後，G1自豪地說取了一間海景房而沾沾自喜，我地就無乜所謂，有房住就無問題。其後我問我既同房人一唔一齊返房放低行李，點知原來佢成五個人一齊來，佢地話自己先上房睇睇環境，有需要先過黎我房。算！唔黎仲好，我一個人佔全間房打跟斗都得

一入到房內，嘩～～～大到不得了 ，無拉拉有三張單人床，仲有個開放式廚房，還有面向海景，真係無得頂～～～ （所以話呢，一仔信唔過，佢篇報導話ｄ三星酒店似民宿，好唔掂；不過我話呢間三星就無得彈，雖然無泳池，外貌不太吸引，但內籠唔錯。 ）

放下行李再落大堂匯合各人出街兼吃晚飯，出發之前我已經搵了一些基本資料，所以心目中有地方落腳食飯，於是一路行一路搵。但跟我班人行得慢，行下行下行左二十分鐘就叫累，又問我知唔知係邊。唉，我都係第一次黎，所以點識路丫，不過都有小小方向感，知道點樣行。晚麻麻，又無街燈，人影都唔多隻，好彩遠處見到有間店舖未關門，又有個人係門口，於是我走去問。一問之下，原來已經不遠了，於是再行；但係跟我既人已經開始抱怨，就話搵唔到就算，求其搵間食啦。我見在前方有一油站，於是再問，一問之下，原來已經近在眼前，不過佢話“close”（由於佢既外語不太流利，所以一咪話close close close）。我心有不甘，再問幾時開鋪及關門，點知佢屎都話“close”，最後我地終於明白佢話呢間法國餐廳已經關門大吉，好失望呀 。

之後眾人決定，返回之前的大路上，求其搵間餐廳食左佢就算；後來我地一行七人入左一間台灣料理。一入去，就發現其中一位跟團的領隊已經同其他團的領隊開緊大餐，唔～～即係呢間係好野黎啦；寒暄幾句，就各自坐下。雖然我知呢間台灣料理出名小火鍋，但由於夜了，唔想吃得太飽，所以叫左幾個小菜就當一餐，埋單位位約七美金。

在席間，我問各人酒店房間滿意嗎？點知只得G1話佢地間房又無浴缸，又細，十分不滿，並表達回去之後要去各人房間參觀。

回到酒店，我地就七人巡房，發覺G1間房唔算細，而且又有小陽台在門外看海景，只係無浴缸，不過佢自己要求高不滿意０姐 。

跟著去我朋友（F1，F2）間房，同我間一樣，不過呢間好正常，兩張單人床；再去另外兩人個間，嘩！！！仲大，有一張king size加兩張單人床，真係要點訓都得。

G1見到個個人間房都大過佢，所以火上加油，要求換房；不過由於全店滿坐，所以無得換，跟著就自發偉論，話我一個人佔一間超大房，唔得，佢要搬黎同我住．．．．下唔係化？！

不過我又唔知點推佢，所以就無出聲。跟住眾人解散，而我就去左朋友處傾談，不久就回房洗澡，點知洗洗下，G1就黎拍我門，但我係洗手間沖緊涼，點樣回應佢呢？所以我照沖，無理佢。不過king size間房既團友聽到出面好嘈(以後簡稱KS1及KS2），，於是出黎望一望，此時我係洗水間內隔著兩道門隱約聽到G1話：『唔得，佢一個人點可以住得晒成間房呀．．．．』

aiya，G1之前一早扮醒目擇左間以為好正既房，宜家眼紅人地無擇房個ｄ大過佢間，點得呀？G1拍多兩下我都無暇回應，佢就走左。我沖完涼之後以為佢會再返黎，但等左成粒鐘都等唔到，跟著就ZZZzzz

附加資料
唔理你參加左邊間旅行社，又或買左邊間旅行社既package，到最後在當地都係由一間叫PPC既台灣旅行社接待。

我在最後一日既自由時間做左好多野，除左影相，就係去搵料。本來諗住搵Ｄ民宿，但係原來短期係唔租既 ；於是搵一些小旅館，發覺價錢也不小，並可比美三星酒店，而且質素一般，有些更貴夾唔抵，最後得出結論，都係要住酒店，無得走雞。

如果只想去沉水而唔係LIVEABOARD，當地DIVE SHOP係可以幫你訂埋酒店，至於是否比自己訂既便宜，我未有問到，遲Ｄ問左返黎再講。

參考網址
http://www.visit-palau.com/
http://www.qcit.com.tw/palau/blue_country.asp
http://home.kimo.com.tw/travelpalau168/
http://www.boca.gov.tw/~boca3007/trav/palau.htm
http://myweb.hinet.net/home5/jimmykuo/1.htm
http://travel.atnext.com/index.cfm?fuseaction=Article.View&articleID=4553638&issueID=20050115
http://tvcity.tvb.com/special/deepsea/index.html
http://hk.news.yahoo.com/050804/60/1f95v.html
http://hk.music.yahoo.com/news/ent/005080201201f62c.html

2005帛琉之旅 之 二

以前本來呢ｄ“同業團”係一帶一，但今次竟然可以比我無quota，所以我廣發英雄貼叫人跟我走，可惜呢班人唔識寶，睇完人地介紹之後先知後悔，不過好在最後我都可以一個“嬲”字出發。

本來諗住吞左張超值機票，就自己攪掂其他事項（呢個係我專長，鐘意自己安排，要乜有乜），但係邊有禁大隻鴨‘０那’跳出街丫；要得呢張機票就要有附帶條件，就係要買埋酒店住宿，加兩日本地遊。

由於距離出發日子短，加上之前又無做詳細既資料搜集，再者佢０個兩日本地遊去既地點都唔錯，價錢又包埋交通，包埋食．．．全部加埋晒都係二千蚊左右，真係去邊到搵丫，所以唔想再用腦，去馬。

到最後加埋ｄ乜費乜費，燃油附加費，機場稅，保安費等等等等，埋單都係三千多蚊！就係禁，我個帛琉五日四夜之旅就出發喇。係咪好抵呢，唔同我去個D係唔係要ｄｕｐ心口!!

出發前，我已經構思好放棄所有本地遊，而全情三日投入水裡世界，點知有個朋友又想用盡晒比左錢既野．．．

橫掂我都未黎過，去下本地遊，睇下其他野都唔錯，於是我就順從其意願喇（宜家有小小失意．．．遲ｄ講）。

講左禁耐，都未講過我既行程，好啦，比大家睇下先啦．

第一日：中午集合乘搭飛機，傍晚到達帛琉（是日包：中午飛機餐）
第二日：今日景點有洛克群島浮潛，山中湖（日軍沉船遺跡），軟珊瑚區，硬珊瑚區　－　全日浮潛（是日包：早，BBQ午，自助晚餐）
第三日：今日景點有長灘島，牛奶湖，水母湖，大斷層，干貝城　－　全日浮潛（是日包：早，BBQ午，晚餐）
第四日：自由活動　－　我就去左三個ｄｉｖｅ喇（是日包：早，晚餐）
第五日：早上自由活動　－　我就用腳走雲成個ｋｏｒｏｒ島影相，差ｄ行到腳仔軟，中午到男人會館，之後前往機場乘搭飛機回港（是日包：早，自助午餐，飛機餐） 附加資料 如果無浮潛用具（面鏡，呼吸管，蛀鞋）可以租，約八美金一日，不過如果唔見左，就要賠得好甘，約五十美元一件．

航班資料
HKG-ROR WED OP852 1835-2330 or
HKG-ROR SAT OP852 1410-1905

and

ROR-HKG WED OP853 1445-1740 or
ROR-HKG SAT OP853 1015-1310

2005帛琉之旅 之 一

前言

由知道有機位到出發，加埋都係一個星期左右；由於比我搵到ｄ好筍好筍既野，二話不說，拼屎都要上機，所以拿拿淋落單，之後才問朋友去唔去。點知朋友唔係出埠就公幹，有ｄ又話唔知邊樹來，三催四請都無反應，所以最後諗住一個人都照走。（呢幾日有ｄ朋友知道我返左黎，又睇過近日的報導，都嫌笨話當時唔跟我一齊去，呵呵．．．．蘇州過後無艇搭，真係唔好怪我；之不過同我去個幾個，一路去就一路多謝我，話我帶歇佢地去嘆世界，抵到爛！） 唔講你地唔知（睇完唔好鬧我），張機票都係一蚊機，不過我無要呢張，要左張九九九既．．．點解？！因為可以玩耐d law. 　（註：直航帛琉時價約三千五左右）

出發前一星期，日日上網check天氣都係雷雨，烏雲，無太陽．．．真係有小小擔心；畢竟，千山萬水去到享受唔到陽光與海灘，絕對會有小小唔多開心。點知第一日搭機到埗，在機場出市區時，只見地上陣陣泥濘，似剛下完雨的景象。坐在車上，望到四周烏燈黑火，乜都無，又加上落過雨，攪到心情麻麻地；不過既來之，則安之。點都會比我玩轉帛琉既！幸好，天公助我也，之後個幾日，日日都同陽光玩遊戲，晒得我地個個變燒豬。其他資料： Palau Asia Pacific Air係一間小型航空公司，原來屬於台灣既（我未上機前以為係美屬既）。由於係新興航點，所以隻飛機細細隻，唔會坐好多人。 飛機外觀唔錯，不過內部唔係好新，應該似是從其他航線改道來用，不過都可以接受；而且坐位蓋著有魚仔圖案的布ｃｏｍ，都算一特色。 又唔知係唔係首航不久，所以上機後就有記念品一份　－　啤牌，雖然唔太值錢，但牌面上印有海底下的美麗圖片，也值得收藏。 到落機時，我一路行一路望，發覺有ｄ乘客竟然唔要呢份記念品，由得佢放置在椅背上．．．於是我同朋友講，要多份就趁手！終於個個滿載而歸！

網上日誌

期待中.....