2004 日本北海道四角之行 之 三

第二個第一次

2　第一次坐JAL要轉內陸機到北海道，以前坐JAL，覺得佢個飛機餐好好味，點知今次再坐，真係差左好多。由香港去日本東京個程，我選了日式咖哩牛肉飯，點知D牛肉 UN到我咬唔開，我唯有用咖哩撈飯，除去勁堅硬的牛肉就好好味喇。

由日本東京再去北海道個程，都成個幾鐘頭，中間轉機時間我要係機場等兩個半鐘，起得飛黎都下午五點半有多，我一心諗住會有一餐食，所以係機場乜都無買來吃，諗住慳得幾多就幾多，點知．．．．上到機後，空姐只係比左杯飲料就收工。嘩~~~~~~~ 由十一點到六點幾都無野再落肚，到步後成九點幾十點，所以你話個晚我有幾肚餓丫！所以又涷又餓既感覺就係禁樣黎既。

重有就係雖然坐返同一間AIRLINE，但由東京轉內陸機到北海道，係要先出關，再攞返D行李，再行過去內陸機COUNTER做CHECKIN既，你話多唔多餘，比係香港其他AIRLINE，一次過攪掂唔洗你攞完又寄，寄完又攞，真係好好多。

還有回程時由東京返香港，本來MENU上是有日式燒雞比客人擇既(我都想擇呢樣)，唔知係咪禽流感勁HIT，所以改左做牛肉咖哩飯都無人知。我自上次去程中招後，今次當然唔會擇啦，所以擇左魚。點知空姐派餐派得慢，D魚黎到我處都涼晒，唔係太有口感，不過都好過我之前選既日式咖哩牛肉飯。