終於有人同我報復喇

呢單野本來都唔想講，因為都斷斷續續攪到我嬲左成年。

話說前年買左部MAG內置硬盤錄影機，點知用左唔夠三個月，有一次趁我去旅行之際，返黎之後就無嗱嗱成部機熄左，我整極都開唔著部機，於是提著保養單去代理處維修。

點知將部機放左係佢地公司接近三個月，一直打電話去追查，但係個熱線電話就乜野時間都唔會有人接聽。三個月後佢地終於打電話來話比我聽修理完畢，可以收返部機。本來滿心歡喜，點知去到既時間佢地比過一部新機我拎走，當作交換。唔係化，如果真係整唔返部機，你洗唔洗整三個月然後先知呀?!我一邊講出我不滿既說話，一邊攞部機行出佢地門口。

點知呢部所謂既新機再用左五個月左右，部機又趁我出左門之後壞左。

於是我又要抬部機返廠整，今次又整左二個月，不過攞返屋企之後好快又壞左，而且還過埋保養期，我又打電話去投訴。最後個經理答應幫我作最後一次檢查及維修，不過之後部機再有乜東瓜豆腐，就唔好再搵佢，而且重要收足維修費。

我對呢部硬盤錄影機在第一次維修時都已經沒有信心，點知部機越整越有事，唔係自動停機，就預較錄影不正常。間維修代理又山旮旯禁遠，我上班時佢又上班，我放工時佢又放工，真係每次都要犧牲我寶貴既星期六睡覺時間，先可以攞部機去修理及取回，所以個一年內由於唔夠瞓，所以我都好興呀。

再者每去去維修及取機的等候時間，都要等成一個鐘先攪得三至四單服務，輪侯時間太長之餘，每次我都見其他既維修人士同我以前的心情一樣，投訴部機維修時間太長及無理由的換部新機比個客就算係整左部機的藉口。 真係買左呢部錄影機既人，有苦自己知。

本來諗住寫信去消費者委員會處投訴，但係講下講下，人又懶，最後不了了之。好彩今次有人寫信去報館投訴，擴大件事，等多些人知呢間公司既貨品係幾無品質。

[quote : from Apple Daily]

DVD錄影機修理無門

先後有使用MAG影音產品的讀者投訴該公司售後服務，分別是DVD錄影機僅使用一年零兩天，即不能維修，以及將DVD影碟機送廠修理，逾兩個月仍無下文。讀者蔡先生投訴，其MAG硬碟式DVD錄影機，使用一年，剛過保用期兩天，電源突不能開 ，致電該公司查詢維修事宜，職員甫知已過保養期，即斬釘截鐵指冇零件，「冇得整」，「部機成二千幾蚊，一年就冇零件，連檢查都懶，好唔合理！」蔡先生不滿代理商完全不提供其他解決方法。本報將蔡先生之投訴轉介MAG之代理商聯訊科技，但多次聯絡該公司之客戶經理跟進，也未獲回應。

游說加錢買電視
另讀者鄧小姐不滿，其MAGDVD影碟機於3月時故障，交代理商維修，但代理商一開始即以冇零件為由，游說她加錢改購LCD電視，她拒絕後即音信全無，未能取回影碟機，「電話留言或電郵，一直冇人回覆，直至你 幫手，先有人聯絡我，話部機整番，但前後隔 成兩個幾月，客戶服務好混亂！」

取自: http://appledaily.atnext.com/images/apple-photos/apple/20070719/small/19lb3p4.jpg