綠林甜品

一直以來都聽到幾個朋友說深水埗有間店舖的糖水/甜品好好吃，但是我每次去深水埗都沒有細心把佢找出來。

日前看了一篇文章報導，終於知道其中一間的地址，所以今次來到深水埗，就決心一嘗它的美味。


在深水埗電腦廣場購物完之後，行出商場轉個灣，綠林甜品就在眼前，再行多兩步。

0依?!點解重門深鎖，關上大閘既!
唔係我一知道你地址黎試味，你就剛巧關門大吉呀~~~~

我唔死心行到鐵閘前睇下係唔係貼左張關門大吉告示，點知又無喎。 望多兩望，比我望到佢門口有個牌寫著開鋪時間係15:00 – 01:00。 我望下隻表，現在才十二點多未夠一點，睇怕我都唔會等佢開門，唯有下次請晚(點出門)。

跟著我去左鴨寮街買野，行下行下，八下八下又買下買下。 無啦啦就攪到二點四十五分。 睇完個錶我就想起綠林，於是行返去元州街個邊，諗住等佢開門就第一個入去食餐飽既。

行到差不多佢門口，就見大閘已捲上，開左門喇。

於是行入間鋪睇下可以落單未，點知已經有人坐滿半間鋪頭，吃到雪雪聲。

依，宜家係二點五十五分，點解會禁既。

唔好理佢先，個肚餓到古古聲，即刻落單叫左個合桃露。 唔洗一分鐘就有得食，我一食落好就知佢唔係用粉沖出來的，而且甜美不重，我鐘意。

三扒兩撥之際，成碗合桃露就比我食晒。 意猶未盡，於是落單叫多碗芝麻糊加豆腐花。 當我今次細心閱讀菜單之際，竟然比我發現了原來星期六，日他們的營業時間是有所不同，提早二點開門，怪不得剛才我來到門口時,發現已經有人正在吃糖水中。

今次碗芝麻糊做得相當好，不過我兼豆腐花未夠滑溜，但以這個平民價錢食到碗自磨的芝麻糊，真係好超值。 ^0^