2007富士24之三 正式出發

由於要搭西北航空08:15既航班，而又要預早兩小時前去到登機櫃台，於是我零晨搭04:15班次的貓頭鷹巴士去機場。

不過今早一起身，喉嚨已經同我響警報，火燒的感覺由口腔內傳出，痛到不得了，我黎緊個多星期不在港，如果無藥食，真係辛苦到完全唔想講說話。

貓頭鷹巴士準時到站，我一上車就想睡多一會，因為昨晚回家太晚，加上收拾行裝到零晨兩點，本來都諗住唔訓通頂到天光，便又怕之後的一天沒氣力登山，所以最後都係調教好鬧鐘，訓左兩個多小時就起床出發。

在巴士上，由於站站停又有晨早要去機場上班員工，所以在唔太寧靜的環境下我都係訓唔著，只係閉著眼休息。在車程上，喉嚨不時隱隱作痛，心中盤算一定要看醫生，而且記得機場又有一間診所駐診，於是決心一闖。

貓頭鷹巴士06:00左右到達香港國際機場，我提著行李正奔七樓的詢問處查詢機場診所辦公時間，服務員回答應在七時開診，並寫下聯絡電話叮嚀我現在打電話去確認診所既辦公時間。我取過電話號碼後見時間還早06:15，就先行到西北航空辦理登機手續。

推著行李來到H列西北航空櫃台，最初只見預辦登機手續的自動電腦，由於我呢張廉價團體張機沒有機票號碼(實際上係一D都唔廉價)，所以不能預先在二十四小時前自行網上預約留位和辦登機手續，所以我要死死地氣去到列尾排隊辦理登機。

去到列尾，一個航空公司的職員問我是否去美國，我回答話唔係，於是佢叫我行返去列頭排隊辦理。吓，唔係化。我又推著行李行到列頭，只見那些是一早自行在網上預約留位和辦登機手續的電子櫃台，正當我兩頭望之際，企係個電子櫃台既西北職員問我係唔係辦理登機手續，我話係，不過無預先上網辦手續喎。佢話唔緊要，幫我攪。當然啦，呢個時間無乜人辦登機手續，所以你咪幫我手0羅。

擇位既時間睇佢個樣就知佢唔耐煩，最後我未擇完，佢就求其擇左一個比我就算數，草草了事。我見到有得申請入會蓄飛行里數，於是問佢攞左張表格，話填完會交返比佢。點知佢依依哦哦，又話唔洗比佢，寄返黎就得。講三講四。最後我唔理佢，填完之後點都比返張表格等佢同我跟進。

交完張表格都係六點四十分左右，於是我就行去間診所，睇下開左門未。點知大門關上，人影都唔多個。呢個時間又口渴，於是上返隔離總部既康樂室飲水。呢次一來一回，都用左成二十分鐘。終於六點五十五分左右再次返到診所門口。今次大門開左喇，一入去就發現已經有三個人坐左係處，我去櫃台登記完就坐埋一邊。時間不停的消逝，但個醫生仍然未返。我是於八掛問坐左係處的病人，諗住問下佢地坐幾點機，如果唔趕時間就讓比我睇醫生先。點知傾完之後，原來佢地都係趕飛機既，所以無望，不過好在唔係三個人要睇醫生，因為佢地係一家人，只係個女有病要睇醫生。

到左七點十分個醫生重未返，我就行去櫃位問個護士，護士答我個醫生已經在路上約七點十五分到處。我又在坐埋一邊等，不過到左七點二十分，個醫生仍然未返到。隻眼望住個鐘，個人就噗噗跳，因為距離上機既時間只剩三十分鐘左右。護士見到呢個焦急既樣都無辦法，因此醫生未返到，佢乜都幫唔到。

七點二十五分，終於有個外國肥人行入黎診所，同護士寒暄幾句就行左入房。噢!!醫生終於返左黎喇，不過係西人，我怕我詞不達意，就問護士呢個醫生識唔識中文，護士話佢識聽，又識講。唔，我都安心一點。

醫生好快就叫左第一個病人入房，睇左個病人五分鐘左右，就宣佈呢個病人唔上得飛機，叫佢家人上去櫃台辦理延期手續。而下一個係我，唔好禁唔好彩比我上唔到機就好了。

入到診療室，醫生問我係唔係趕上機，我話係，跟著就開始問病証，我三言兩語講出病情。醫生就手起筆落開藥比我，成個過程唔洗三分鐘攪掂。行返出大堂坐低等取藥又望下個錶。都已經七點三十五分了。

等左不久，都唔覺個護士幫我執藥，於是我行埋櫃台，比點壓力佢，等佢知道我已經等無可等。護士見我迫到埋身，就手忙腳亂攞起張病歷幫我配藥。左擇右擇，終於全部執齊，我取過藥後，就飛撲埋去個蒸餾水機飲水食藥，之後行出門口趕去人民入境事務處出國了。


此時還接到隊友L君的長途電話，我叮嚀L君晚上到埗東京後，打我日本朋友的手機電話找我，以便互相照應。

幸好我坐的是早機，早上航班不是太密，因此不太多人進入入境事出境。我唔洗十分鐘就辦好手續了。之後加快引擎，直奔到閘口登機。

未去到閘口，已經見到閘口外無人龍排隊，即係全部乘客入左飛機倉。我被審查過登機証，就順利進入機倉了。